來自F1賽場嘅GT跑車</BR>Mercedes-AMG GT 63 S E Performance - Advertisement Feature - TopGear

ADVERTISEMENT

Advertisement Feature

來自F1賽場嘅GT跑車
Mercedes-AMG GT 63 S E Performance

Top Gear Team Published: 28 Oct 2022

唔少汽車品牌都有投身賽車運動以求將賽車元素下放至量產車款,不過始終比較少會直接移植。平治參與咗F1賽車運動一段時間,最終炮製出非常成功嘅Mercedes-AMG Petronas混能戰車,車手咸美頓都係靠佢拎七連冠,而Mercedes-AMG就選擇將電氣技術擺落GT 63 S E Performance身上,帶嚟史上輸出最強量產AMG。

雖然機械引擎發展已經好成熟,但效率最高嘅引擎都難免會喺低轉嗰陣出現遲滯,反觀電力系統就冇呢個問題,最大扭力可以即時輸出,因此利用電池混能動力去補足引擎就可以提供更即時嘅動力,同時又唔會完全喪失機械風味,採取呢個策略嘅AMG GT 63 S E Performance係AMG第一架Performance Hybrid混能技術跑車。

高性能電池

AMG GT 63 S E Performance嘅混能系統中選用F1同類液體冷卻電池,呢種直接冷卻可以保持電池工作溫度喺45度左右,無論不斷加速定減速都唔會對效率造成太大影響,能量密度比唔係直接冷卻嘅電池高一倍。作為高性能車款,加入電池雖然可以提升性能輸出,但重量太重嘅話反而會帶嚟負擔,GT 63 S E Performance嘅6.1kWh電池僅重89kg,可以喺性能同重量上取得平衡。功能上以快速釋放同回收電能為主,續航力為次。另外,高性能電池可以透過充電站或家用充電機直接叉電,提供12公里純電續航力。

拆解電動摩打

AMG GT 63 S E Performance嘅混能系統放喺後軸,摩打動力直接傳遞到後轆,分擔車頭引擎車重,兩個車軸負荷變得更平均。電動摩打最高輸出204匹馬力,連埋4.0 V8引擎總輸出高達843匹同150kgm,只需2.9秒就完成0-100加速,0-200亦能夠喺十秒以內完成,極速達316km/h,屬於係超跑水平。新車性能唔單止喺規格表上勁過非混能AMG GT 63 S,試車手揸住佢跑紐布靈北圈同賀根咸跑道,圈速比AMG GT 63 S分別快一秒同兩秒。電摩打連接住一個兩前速波箱,當車速上升至140km/h或摩打轉速達每分鐘13,500轉嗰陣,波箱就會轉至二波。雖然話摩打同引擎一前一後工作,為前後轆提供動力,但GT 63 S E Performance嘅完全可變四驅系統會喺後轆打滑時將電摩打動力經傳動軸送到前轆,連埋電子控制限滑差速器一齊爭取最大抓地力。

動力回收 & 駕駛模式

新車同純電電動車一樣設有動力回收,有四級選擇,由好似手波車咁空波滑行到one-pedal drive都得。駕駛模式則有七種,入到menu望望,揀「Comfort」模式的話車輛就會用摩打靜靜哋起步,唔怕嘈親鄰居,而「Electric」純電動模式顧名思義唔會打搞引擎,最高時速限制喺130km/h。落場玩的話可以試吓「RACE」,踩盡油加速時電力可以全面輸出,動力回收幅度亦會加強以盡快充滿電池。

AMG懸掛 + AMG動態控制

雖然混能系統係重點,AMG GT 63 S E Performance一樣配備AMG Ride Control+懸掛同AMG Dynamics 動態控制系統,可以調節懸掛硬度、ESP、四驅系統、電子限滑差速器,同時透過感應器按車速、橫向加速同轉向角度等資訊判斷車輛反應,預測駕駛者想要咩表現。

內外更新

單講外觀,車迷一時三刻未必搵到新車同非混能版嘅分別,廠方喺GT 63 S E Performance嘅特別訂製目錄上加入七種新顏色,隨車配備嘅AMG高性能陶瓷複合制動系統尺寸亦比非混能版大(前420x40mm,後380x32mm),行到車尾仲會搵到電池充電口。打開車門,車廂MBUX資訊系統特設混能顯示,提供驅動系統動力流向、摩打轉速、輸出、扭力、溫度、電池溫度等一大堆數據畀駕駛者參考。

 

睇完之後係咪對呢款AMG之王同佢嘅混能技術了解多咗呢?話埋你知,Mercedes-AMG GT 63 S E Performance已經到咗香港,售價$3,890,000起,去平治港島品牌中心又或者平治九龍品牌中心就可以搵到佢喇!

相關文章

最新文章