萬事得近年愈來愈進取，新一代Mazda3賣相深得歡心又高級，還有油耗似柴油的新汽油引擎，VW Golf唔驚就假。
WORDS: LUBY CHOW
仲記得上年的東京車展，萬事得展出超靚仔的Kai概念車，當時大家都好期待新款Mazda3設計跟到幾多成。今年洛杉磯車展，萬事得終於發表全新第四代Mazda3，果然夠（似）Kai！
今代Mazda3依舊分為五門揭背和四門房車版，先講大熱揭背，睇樣似乎參考過Ford Focus、Mercedes-Benz A-Class和Volkswagen Golf等經典車，有齊運動感和實用性，不過今次的C柱未必人人受落。入正題，新車採用全新SKYACTIV-Vehicle Architecture底盤，全新Skyactiv-X引擎以壓縮點火，簡單講就是一副像柴油引擎般低油耗卻性能表現高的汽油引擎，不過廠方暫時未有新數據。除了Skyactiv-X，亦可選Skyactiv-G 1.5、Skyactiv-G 2.0，以及Skyactiv-D 1.8引擎，配6速自動波或手波。i-Activ AWD系統還識得偵測四輪垂直負荷，助GVC Plus系統管理前後輪的扭力分佈。仲有，更厲害的是，水潑運作速度亦經過仔細規劃，以改善水撥表現，嘩。內櫳以簡約為主，整體感覺高級程度似歐洲車，Skyactiv-X揭背可選紅櫳，幾乎全部細節都好有質感。資訊娛樂系統螢幕增大至8.8吋，依然是旋鈕式控制。價格現時仍是未知數，預計明年首季開售，看似原本考慮買VW Golf的朋友又多個選擇。
Mazda3新舊對比（左新、右舊）
Mazda3五門揭背版
Mazda3四門房車版
