今時今日，車款愈造愈大部嘅年代，SUV界有將車愈造愈細部嘅現象，而呢啲車亦喺市場上愈來愈普及。
佢哋唔再叫SUV，而係叫Crossover。VW今次就乘住個勢，推出全新車款T-Cross，係暫時咁多間德國車廠販售最「微型」嘅SUV。佢嘅大小介乎於細佬Polo同埋Audi Q2之間。車長4,107mm，高1,558mm，沿用家族式MQB底盤，未將後座放平時，尾箱已經有455L容量，係同級之中最多。引擎方面，英國版會有兩款一公升三氣缸TSI汽油引擎，分別為93匹及113匹，而波箱則有五或六速手波以及七速DSG可選擇。雖然未知道邊副引擎會嚟香港，不過相信香港只會有七速DSG，手波？咪傻啦。內裝方面，承繼VW一貫設計，並無十分大嘅驚喜。T-Cross搭載咗第二代VW主動式安全系統，包括盲點偵查、行人偵查、主動式定速巡航、車道偏離、緊急自動剎車等設備。T-Cross喺英國嘅售價大約由17,000鎊起，於2019年春季開賣。如果呢部車嚟到香港，定價喺25萬以下應該會幾有話題。
