Citroen C3
飛躍進步獎

Posted 05/05/18

無比較點拎飛躍進步獎呢?總之我有我的道理啦。

WORDS:YIU TSZ HO / PICTURES:KENJI LEUNG

的確今次是第一次接觸Citroen C3,根本無從比較。不過,上年試過柴油私家車C4 Cactus,雖然車系不同,但設計大同小異,加上是我們近年唯一試過的Citroen,所以拿來比應該說得過去。早兩年柴油私家車搶灘撲過來,大大細細平平貴貴一於有殺錯無放過,C4 Cactus食住個勢都叫有點斬獲,以Citroen初回歸香港之作來說,路上曝光率算飲得杯落。不過,如果要我揀那年試得最無癮、最搲頭的一部車,C4 Cactus好有可能被貼中。引擎其實ok,嘈雜是預料之內,力水夠慳到油就夠過關,衰在波箱是歷史博物館級的單離合器半自動波,拖拖拉拉似轉不轉定根本轉不到波的反應的確難頂。本來幾新鮮幾過癮的look值得加分,坐到入去先知用料平平造工平平,其實都不出奇,後座夠膽死用開得一條罅的雞翼窗才印象深刻。如果個樣不是有趣,如果不是柴油私家車,C4 Cactus真的好難有說服力。柴油潮玩完,比較新的C3來到,雖用回電油引擎,一比之下居然心情舒暢。

外形一樣過癮襟睇,打個和。無用雞翼窗,進步。波箱變返正常有扭力轉換器的自動波,進步。車廂……造工雖然都差不多,但睇落比較多細節,尤其是套櫈,好睇,都當進步。作為一部hatchback,C3的定位似日本車多過歐洲車,後座用bench seat固然沒那麼豪華,但勝在慳位,換到多些legroom。不追求設備造工,放多點心思落去諗設計同賣相,可能就是揀廿萬頭hatchback的人想要的東西。對比Honda Jazz、Nissan Note這類「主流」,有新鮮感也是優勢。今次主題講「平得來有趣」,另類不過火、新鮮有收視都可以是有趣,起碼朋友見到你部車會問長問短,而非隨便講句「哦,你換咗哩部啊。」

如果拎走Citroen的車徽,根本無頭緒去估是甚麼車,好看又新鮮。

外形不錯,揸落又如何?先講波箱,1至10分,C4 Cactus那套半自動波箱大概是兩分,行得郁值一分,有六個波畀多一分。而C3這套,就有五分,剛合格。選擇波段困難症醫好了大半,正常車速時無乜異樣,有一點要注意是轉波時機會遲過普通車少少,即是就算順住踩轉速都會較高才轉波,這不是波箱的問題,而是它用的是三汽缸小引擎,得1.2公升,所以要推高少少轉數累積夠扭力才轉。實情佢都有個sport mode,匿埋在波棍前面,即是中控台的最下面,伸盡左手也還差少少才撳得到……啊……好不容易轉了sport mode,效果都算明顯,引擎再肉緊少少,跑起來有陣清爽感覺,1.2公升turbo小引擎雖然談不上好好力,要它突然加速反應也不算那麼即時,要等稍為手腳慢的波箱幫拖,但它勝在肯捱肯上,似個初出社會打工有點衝勁的小子。三汽缸設計難免會震一點、嘈一點,不過怠速時居然比隔離同樣是三汽缸的Mini One Countryman少震盪,當然跑起來,車身隔音還是差些少。只不過,如果你揸開1.5 NA加CVT的日本車,你已有免疫力,不會覺C3太吵耳。

其實無論是否遷就左軚,S粒掣放這裏一樣難撳。

其實C3的動態都幾正宗,正宗一部簡單hatchback。軚盤輕輕的,少少疏離卻不離譜,懸掛也很中性,車身有清晰的擺動,老老實實話你知還剩幾多貨。轉向不足推下推下?相當輕微,反正車速快極有限,可以由得它不理,自自然然收少少油或扭多少少軚就搞得掂。優點是相當輕巧,動力也不錯,似乎近年的三汽缸引擎開始變得成熟實用。至於缺點,主要是隔音麻麻,路噪風噪產地直送,開大喇叭掩耳盜鈴可能是不錯的解困方案。

而家買得到的hatchback,數賣相它應該是數一數二有趣,揸起來也不是一條悶棍,雖然廿萬頭車價並非超級抵玩,但要扮型懶獨特,付出多少少有時也會心甘情願。

Upcycling演繹法之:我條皮帶變門抽。
車門附送「撳極唔爆啪啪紙」兩大片,有治癒減壓之效。

原文來自《TopGear極速誌》 2018年5月 第116期

Citroen C3規格
引擎:1,199c.c.直三turbo
馬力:110匹/5,500rpm
扭力:20.9kgm/1,500rpm
傳動:前輪驅動 6前速自動波
體積:3,996 x 1,829 x 1,490mm
油耗:4.9L/100km
售價:$228,000
月供:$3,760(10%首期/60期/利率2.75%)