第二代Touran不為別的,只為德國小MPV爭口氣,讓本地家庭在日系以外還有得揀。

  「座位七個,偈呢1.4,仲有啲靚仔添。」我相信單憑這三句說話,就可以引誘到過半數準MPV車主追問究竟在講甚麼車。即刻開估,講緊的就是第二代「途安」,oh sorry!最近去得海港城多,一不小心就學埋強國口吻,再講一次,是全新第二代的VW Touran。你可能會話,「唓!上代咪又係七個位用1.4引擎,有乜咁巴閉啊?」巴閉在那七個座位升了呢,副引擎也襟用了,還有好幾個地方都進化了,就好似打機有得揀都會用第三代超級撒亞人而不是第二代,就算他依然是有兩隻手兩隻眼的悟空。至於進化成怎樣,逐樣話過你知。

  首先,買MPV的人對於車裏面座位的要求、講究、挑剔比起屋企張梳化有過之而無不及,因為老婆仔女爸爸媽媽外父外母甚至工人姐姐求其一個(或全部)坐得不舒服,受罪的會是司機位上那個人,亦即是當日在支票上畫了一隻龜的人。日本MPV受歡迎,就是因為櫈容易摺、人容易走位,設計上的小聰明變成日常的大實用。還記得上代Touran,摺起中排的動作是摺完再翻的前滾翻,難度分6.9。時至今代,明智地摒棄了這種不文明的過時動作,地台加兩條路軌,椅背頂加個手抽,一拉順勢一推,整張櫈便能半往前摺兼且跣向前排座位,空出一條一呎多的走道供出入第三排。過程簡單輕鬆,一隻手加多一秒鐘就完成,難度分急降至1.1,估計連小學生都搞得掂,起碼易過操TSA題目。易摺是賣點,摺得叻也是,全車七張獨立櫈,有六張可以摺平若非司機位新增了電動調校功能,我估設計師有衝動索性想七張櫈都摺得。那叻在哪呢?叻在空間可以拉長發展,摺起左邊前中後排,兩米長的滑浪板也有安身之所,還可以四個人繼續上路(前一中二後一),正!就算不求放得多,只為好座好用,今代一樣……