新登場的Hustler及500X都是混種街車,在off road強豪Defender及Ranger護航下,走入BB班難度的泥地草堆,能夠全身而退還是醜態百出呢?

  阿安:今次有四部不知堅定流、又英又美又日又意的off-road車一齊玩,實在難以分組,不如由細至大開始講?上次我開k-car是幾年幾月幾日?估不到這種車還會在這個江湖出現。我對它的前世今生,所知完全是零。

  Donny:Hustler 前年才開賣,據知在日本好受歡迎,去年10月去東京車展,在街上也遇過不少。

  姚子浩:Hustler都幾有趣,盒仔車加SUV的混合體,個樣怪得來又幾易入口。658c.c.三汽缸turbo引擎,雖然只有64匹,不過車重就得820kg,聽落不算太脫離現實。

  阿安:但我見到今次四部車一齊行,它永遠做奠後大軍,不脫離現實但脫進車隊。

  姚子浩:其實又沒你想得這麼差。部車因為夠輕,加速不算吃力,動力承接得幾爽,一路踩上80km/h左右都很順暢。雖然完全沒有爆發力,不過一部60幾匹的車仔已經交到功課。上到高速公路,由定速80km/h再推上110km/h,反應都見得人,未至於有心無力。部車成日落後,不太關動力事,反而因為制動力很弱,往往要預留較多時間做煞車,所以我寧願落後。

  阿安:你又知我會想像它好差?不過你答對了,我的預期確是如此,加速無力、噪、未破三個位就見頂,同埋一轉彎就有種飄飄然的危機感。十幾年前還ok,但今天的汽車比我們窩居更舒服,你覺得以2016標準來講……