Bridgestone ECOPIA EP200 好多人以為撞車後有買全保就唔使煩,以為所有整車錢都會由保險公司負責搞惦,但最後埋單計數,原來仲要貼番三四成出嚟整車添,點解會咁樣?原來仲有好多人唔知道保險公司喺每一單事故索償時,都會有好多費用要扣除,首先當然係墊底費啦!所以你必須喺買汽車全保時,不要單睇保費是否最平,因為唔少平車保個墊底費就相當之高,我試個幫個客報份Mazda3嘅全保,佢話我間保險公司貴佢做開嗰間成九舊水咁多,想俾我做呢單生意仔都唔得啦!除非我減嗰九舊水啦!我即刻同佢講:「生意做唔做得成就好閒,但係你買得全保就梗係想有足夠嘅保障啦!如果唔係你剩買三保咪仲平,你返屋企攞我份報價對下你份單啲terms先決定啦!」結果佢冇理我嘅忠告,哈哈!三個星期後呢個客架車就出事撞咗,跟住拖落嚟我處!雖然撞得唔算甘,但一塊頭冚、左沙板、頭泵把、龍門架、鬼面罩、兩支大燈同埋兩支霧燈,買料都要近$25,000,加埋人工同噴油$8,000,咁就$33,000先搞得掂,個客話唔緊要啦!